UNICEF, barnahjálp Sameinuð þjóðanna, varar við að hætta sé á öðrum kólerufaraldri í Jemen í þessum mánuði. Rúmlega ein milljón barna sýktist af kóleru í landinu á síðasta ári vegna lélegs aðgengis að vatni og bólusetningu.
Geert Cappelaere hjá UNICEF segir að barn deyi nú á tíu mínútna fresti í Jemen af sjúkdómum sem koma mætti í veg fyrir. „Við skulum ekkert vera að blekkja okkur. Kóleran mun snúa aftur,“ sagði Cappalaere í samtali við Guardian. „Þegar regntíminn hefst eftir nokkrar vikur og án mikillar fjárfestingar nú þegar, þá mun kólera leggjast aftur á jemensk börn.“
Cappelaere segir UNICEF nú hafa mánuðum saman verið í samningaviðræðum við stríðandi öfl um að fá leyfi til að hefja bólusetningar og að sumar hersveitir hafi bannað að sólarrafhlöður, sem eru nauðsynlegar fyrir brunndælur, séu fluttar inn á svæðin.
„Við notum endalausan tíma, orku og peninga í málefni sem við ættum ekki einu sinni að þurfa að semja um. Líf barna eiga ekki að vera samningsatriði,“ sagði hann.
Á fréttamannafundi í Jórdaníu, þar sem hann greindi frá vikulangri heimsókn sinni til Jemen, sakaði Cappalaere ráðandi fylkingar í átökunum um að heyja „grimmilegt og tilgangslaust stríð gegn börnum“.
„Engir þátttakendur í þessu stríði hafa í svo mikið sem eitt augnablik sýnt nokkra virðingu fyrir þeirri helgu meginreglu að vernda börn.“
Neyðarástand sé einnig í menntunarmálum í landinu þar sem um hálf milljón barna til viðbótar geti ekki lengur gengið í skóla. „Tvær milljónir jemenskra drengja og stúlkna ganga ekki lengur í skóla eða hafa aldrei fengið tækifæri til að ganga í skóla,“ sagði hann. Rúmlega 500 skólabyggingar hafi verið eyðilagðar og meirihluti kennara fái engin laun.
Þrjú ár eru nú frá því að stríðið í Jemen hófst og hafa UNICEF og fjöldi annarra hjálparsamtaka hvatt stríðandi fylkingar til að koma saman við samningaborðið þar sem hernaðarlausn muni ekki bjarga landinu frá frekari hörmungum.