9 ára gagnrýnd fyrir að virða ekki þjóðsönginn

Níu ára áströlsk stúlka sem neitaði að standa er þjóðsöngurinn var fluttur, í virðingarskyni við frumbyggja Ástralíu, hefur mátt sæta árásum valdamikilla stjórnmálamanna. Segir fréttastofa CNN suma þeirra hafa hvatt til þess að hún verði rekin úr skóla fyrir uppátækið.

Harper Nielsen er  9 ára og býr í Queensland-fylki. Hún sagði í samtali við áströlsku Nine News-sjónvarpsstöðina að hún hefði setið undir flutningi þjóðsöngsins af því að hún teldi hann sýna áströlskum frumbyggjum óvirðingu.

Í þjóðsöngnum er talað um unga ljósa þjóð og segir Harper þar eingöngu verið að vísa til hvítra íbúa Ástralíu. „Þegar það er talað um að við séum ung þá er fullkomlega horft fram hjá því að frumbyggjarnir voru hér í 50.000 ár á undan okkur,“ bætti hún við.

Frumbyggjar eru um 2% allra íbúa Ástralíu og búa við tvöfalt hærra hlutfall ungbarnadauða og lifa skemur en aðrir íbúar landsins.

„Gefa henni duglegt spark í rassinn“

Öldungadeildarþingmaðurinn Pauline Hanson, sem er umdeild hægrimanneskja, sagði ástralska skóla vera að „heilaþvo“ börn og hvatti til þess að Harper yrði tekin úr skóla.

„Þetta snýst um hver við erum sem þjóð. Þetta eru hluti af okkur ...Hér erum við með barn sem er búið að heilaþvo og ég skal segja ykkur, ég myndi gefa henni duglegt spark í rassinn,“ sagði Hanson í myndbandsfærslu.

„Þessi stúlka er á rangri leið og ég kenni foreldrunum um að hvetja til þessa.“

Þá sagði Tony Abbott, fyrrverandi forsætisráðherra Ástralíu, í viðtali við „GB-útvarpsstöðina að Harper ætti að „fylgja reglunum“.

„Það er til merkis um mannasiði og kurteisi að standa þegar þjóðsöngurinn er fluttur,“ sagði Abbot sem nú gegnir stöðu sérstaks sendifulltrúa í málefnum frumbyggja.

Þá sagði Jarrod Bleijie, hjá frjálslynda flokknum í Queensland, sem fer með skuggaráðuneyti menntamála, að Harper væri „óþekktarormur“.

„Foreldrar hennar eiga að skammast sín fyrir að nota hana sem pólitískt peð. Hættu þessum kjánalegu mótmælum og vertu stolt af að syngja þjóðsönginn,“ sagði Bleije og kvað hana misvirða fyrrverandi hermenn með setu sinni.

Þá teldi hann að reka ætti Harper úr skóla héldi hún áfram að sitja undir þjóðsöngnum.

• Blogga um frétt