Skráðum kjósendum í Bandaríkjunum fjölgaði um 65.000 eftir að bandaríska tónlistarkonan Taylor Swift birti færslu á Instagram-aðgangi sínum þar sem hún lýsti yfir stuðningi við frambjóðanda demókrata, Phil Bredesen, til öldungadeildar Bandaríkjaþings í sínu heimaríki, Tennessee.
Í færslunni hvatti hún einnig fylgjendur sína, sem eru 112 milljónir, til að nýta kosningaréttinn. Swift ræðst einnig harkalega á mótframbjóðanda demókrata, repúblikanann Marsha Blackburn, sem er þingmaður ríkisins í öldungadeildinni. Swift segir að hún hafi yfirleitt reynt að kjósa konur og muni gera það áfram en hún geti einfaldlega ekki stutt Blackburn þar sem það skelfi hana hvernig hún hafi greitt atkvæði á þingi.
„Hún greiddi atkvæði gegn því að konur fengju jöfn laun og karlar. Hún greiddi atkvæði gegn endurnýjun á lögum sem snúa að ofbeldi gegn konum. Lögum sem er ætlað að verja konur fyrir heimilisofbeldi, nauðgunum á stefnumótum og eltihrellum,“ skrifar Swift, en hún hafði betur í dómsmáli gegn fyrrverandi útvarpsmanni sem hún sakaði um að hafa áreitt sig kynferðislega.
Swift hefur hingað til ekki tjáð stjórnmálaskoðanir sínar opinberlega en hún segist ekki lengur geta setið hljóð hjá. Bandaríkjamenn ganga að kjörborðinu í 6. nóvember þar sem kosið verður um öll 435 sætin í fulltrúadeildinni og 35 af 100 sætum í öldungadeildinni.
Swift segir að skoðanir Blackburn samræmist ekki hennar gildum sem íbúa í Tennessee og að hún muni kjósa Bredesen í kosningu til öldungadeildarinnar og Jim Cooper í fulltrúadeildina. Hún hvetur aðdáendur sína til þess að taka þátt í kosningunum og að kynna sér málefnin og þau gildi sem frambjóðendurnir standa fyrir.
„Fyrir mörg okkar er ekki líklegt að við finnum nokkurn tíma frambjóðanda eða flokk sem við erum 100% sammála um öll málefni en við verðum samt sem áður að greiða atkvæði,“ segir í færslu Swift.
Svo virðist sem fylgjendur Swift hafi heldur betur tekið við sér. Söngkonan birti færsluna á sunnudag og sólarhring síðar hafði skráðum kjósendum fjölgað um 65.000. Í Bandaríkjunum er fyrirkomulagið þannig að til að virkja kosningaréttinn þurfa kjósendur að skrá sig sérstaklega til að kjósa.
Kamari Guthrie, samskiptastjóri vote.org, segir í samtali við BuzzFeed að þriðjungi fleiri skráðu sig á einum sólarhring eftir færslu Swift en skráðu sig allan septembermánuð, þegar 190.178 skráðu sig. „Guði sé lof fyrir Taylor Swift,“ segir Guthrie.
Færslu Swift var almennt vel tekið, en einn maður hafði þó eitthvað út á hana að setja og var það sjálfur Bandaríkjaforseti, Donald Trump. Þegar honum varð ljóst að Swift hafði dásamað tvo demókrata opinberlega sagði hann: „Segjum bara að mér líki 25% minna við tónlist Taylor núna, allt í lagi?“
Vikan hefur því verið viðburðarrík hjá Swift sem gerði sér lítið fyrir og vann til fernra verðlauna á bandarísku tónlistarverðlaununum, American Music Awards, sem fram fóru í Los Angeles á þriðjudagskvöld. Swift sló þar með met Whitney Houston yfir fjölda verðlauna sem söngkona hefur unnið á ferlinum. Verðlaun Swift eru orðin 23 talsins en Houston vann til 22 verðlauna á sínum ferli.
Í þakkarræðu sinni fyrir verðlaun sem söngkona ársins í poppi og rokki nýtti hún tækifærið og hvatti fólk til að kjósa í þingkosningunum 6. nóvember.