Björgunarsveitir hafa fundið fleiri líkamsleifar á staðnum þar sem farþegaþota indónesíska lággjaldaflugfélagsins Lion Air hrapaði í hafið aðfaranótt mánudagsins að íslenskum tíma með 189 manns um borð. Tugir kafara hafa tekið þátt í björgunaraðgerðunum.
Fram kemur í frétt AFP að björgunarsveitarfólk hafi fyllt fjölda líkpoka af líkamsleifum og verða leifarnar fluttar til Jakarta, höfuðborgar Indónesíu, þar sem borin verða kennsl á þær. Meðal annars hafa fundist líkamsleifar barns en þrjú börn voru um borð í þotunni.
Töluvert af braki úr farþegaþotunni hefur einnig fundist sem og persónulegar eigur eins og skór, fatnaður og veski. Haft er eftir yfirmanni björgunarsveitanna að öllu sem hafi fundist á yfirborði hafsins hafi verið safnað saman. Verið sé að leita að þotunni sjálfri.
Björgunarsveitir gera ekki ráð fyrir að finna neinn á lífi. Líkamsleifarnar sem fundist hafi bendi til þess að farþegaþotan hafi skollið mjög harkalega niður í hafið en talið er að flak hennar liggi á um 30-40 metra dýpi út af strönd indónesísku eyjarinnar Java.
Fimm herskip, sem búin eru búnaði til þess að greina málm undir yfirborði sjávar, taka þátt í leitinni að farþegaþotunni og flugritum hennar. Þotan var á leið til indónesísku borgarinnar Pangkal Pinang og hafði verið 13 mínútur á lofti þegar samband rofnaði við hana.
Flugstjórinn hafði skömmu áður óskað eftir heimild til þess að snúa aftur til flugvallarins í Jakarta. Farþegaþotan var tekin í notkun í ágúst en gert var við vélarbilun í henni skömmu fyrir flugferðina. Hugsanlegt er þó talið að ekki hafi tekist að laga hana að fullu.