Úkraínska þingið er nú með til skoðunar að leggja á herlög í landinu eftir að Rússar hertóku þrjú úkraínsk herskip skammt frá Krímskaganum um helgina.
Beittu Rússar vopnum gegn úkraínsku herskipunum og hafa sakað áhafnir þeirra um að hafa farið inn í rússneska landhelgi án heimildar og óttast margir að þetta þýði aukin hernaðarumsvif á þessum slóðum.
Sagði Petro Porósjenkó Úkraínuforseti í dag að hann ætli að leggja til að þingið samþykki að herlögum verði komið á til næstu 30 daga og segir BBC það vera helmingi styttri tíma en öryggis- og varnarmálanefnd þingsins mælti með í gær.
Sagði Porósjenkó í sjónvarpsávarpi að hann vilji ekki að herlög hafi áhrif á forsetakosningar sem fara eiga fram í landinu í lok mars á næsta ári, en að verði herlög samþykkt þá muni þau taka gildi á miðvikudagsmorgun.
Öryggisráð Sameinuðu þjóðanna boðaði til neyðarfundar vegna málsins í dag, en engin niðurstaða lá fyrir að fundi loknum. Málið hefur einnig ratað á borð Atlantshafsbandalagsins sem einnig boðaði til neyðarfundar í höfuðstöðvum sínum í Brussel.
Úkraínsk yfirvöld segja að sex hermenn hafi særst við yfirtöku herskipanna, þar af tveir alvarlega, en rússneska leyniþjónustan FSB segir að þrír hermenn hafi særst og enginn þeirra sé í lífhættu.
Aðgerðum Rússa var mótmælt í Kænugarði í gærkvöldi og safnaðist hópur saman fyrir utan sendiráð Rússa í borginni.