Hæstaréttardómarinn Ruth Bader Ginsburg hefur gengist undir aðgerð til að fjarlægja tvo krabbameinshnúða úr lunga. Hæstiréttur Bandaríkjanna greindi frá þessu í dag.
Upp komst um meinið þegar Ginsburg, sem er 85 ára, braut þrjú rifbein þegar hún féll á skrifstofu sinni í byrjun nóvember.
Samkvæmt tilkynningu Hæstaréttar tókst að fjarlægja bæði meinin að fullu. Ginsburg hvílist nú eftir aðgerðina og ekki er talið að hún þurfi á frekari meðferð að halda.
Ginsburg var skipuð í Hæstarétt Bandaríkjanna árið 1993 og er elsti dómarinn við réttinn. Hún braut tvö rifbein árið 2012 og missti þá ekkert úr vinnu og sneri hratt til baka það sama ár eftir að hafa undirgengist hjartaaðgerð. Þá hefur hún einnig greinst með krabbamein og sneri til vinnu þremur vikum eftir að meinið var skorið í burtu.
Hún er í hópi frjálslyndari dómara við Hæstarétt Bandaríkjanna en Donald Trump Bandaríkjaforseti hefur þegar náð að skipa tvo íhaldssama dómara í Hæstaréttinn.