Erlent | mbl | 12.1.2019 | 22:40

Hvolpurinn gæti leikið stórt hlutverk

Norskur rannsóknarlögreglumaður spígsporar með hund fyrir utan heimili auðkýfingsins Tom Hagen. Það er þó ekki þessi hvutti, heldur hvolpur Anne Elisabet Hagen, sem var læstur inni í herbergi. AFP

Hvolpur Anne-Elisabeth Falkevik Hagen gæti nú leikið mikilvægt hlutverk í rannsókn á hvarfi Falkevik Hagen. Hvolpurinn, sem er af whippet-tegund, var læstur inni í herbergi þegar eiginmaður Hagen, auðkýfingurinn Tom Hagen, kom heim daginn sem eiginkona hans var numin á brott af heimili þeirra hjóna.

Frá þessu er greint á vef NRK.

„Hafi gerandinn handleikið hundinn gæti erfðasýni (DNA) fundist á honum,“ sagði Kittil Haugen, fyrrverandi lögreglumaður og hundaþjálfari.

Stutt er síðan norska lögreglan ákvað að gera mannránið opinbert en það hafði þá verið rannsakað í leyni í tíu vikur. Ræningjarnir krefjast 85,9 milljóna norskra króna sem lausnargjalds, andvirði 1,2 milljarða króna.

Lögreglan hefur óskað eftir að ná tali af þremenningum sem hafa stöðu vitnis í málinu og birti hún tvö myndbönd af mönnunum í fyrradag. Um 350 ábendingar hafa borist lögreglunni frá því í gær og einn verið yfirheyrður í tengslum við ránið.

Frétt af mbl.is

350 ábendingar á einum sólarhring

Mál Hagen-hjónanna er algjört forgangsmál norsku lögreglunnar sem hefur lagt nótt við nýtan dag síðan á hrekkjavöku við að reyna að grafa upp einhverja vitneskju um örlög hinnar 68 ára gömlu Falkevik Hagen sem hvarf sporlaust af heimili sínu.

Með kröfunni fylgdi hótun um að eiginkona hans yrði umsvifalaust ráðin af dögum hefði hann samband við lögreglu og fóru því fyrstu fundir Hagen og lögreglunnar fram með þeim hætti að hann hitti óeinkennisklædda lögreglumenn á bensínstöð nokkrum sinnum auk þess sem óeinkennt tæknilið lögreglu rannsakaði heimili hjónanna í 14 sólarhringa í leit að vísbendingum.