Skandall skekur skautahlaupin

Shim Suk-hee, tvöfaldur gullmedalíuhafi á Ólympíuleikunum, hefur sætt áralöngu kynferðisofbeldi.
Shim Suk-hee, tvöfaldur gullmedalíuhafi á Ólympíuleikunum, hefur sætt áralöngu kynferðisofbeldi. AFP

Ásakanir um kynferðisbrot skautahlaupsþjálfara skekja Suður-Kóreu þessa dagana, en fjöldi kvenna sem stundar skautahlaup þar í landi hefur sakað skautasamfélagið um þöggun á kynferðisbrotum sem þær hafa orðið fyrir af höndum þjálfara sinna.

Suður-Kórea hefur lengi verið í fremstu röð í íþróttinni og hafa landslið Suður-Kóreu unnið ólympíugull í íþróttinni 24 sinnum. BBC greinir frá.

Fjöldi fólks lítur svo á að nú sé #Metoo-hreyfingin loks komin á skrið í Suður-Kóreu, þrátt fyrir að um sé að ræða nokkuð afmarkað samfélag skautahlaupsins, íþróttar hinna ríku.

Nú síðast stigu fimm konur fram með sögur sínar, þó ekki undir nafni af ótta við hefndaraðgerðir þeirra sem styðja þjálfara þeirra. Þær tilheyra samtökum sem kalla sig Samstaða ungra skautahlaupara og eru meðal annars studd af þingkonunni Sohn Hye-won.

Ein kvennanna greinir frá því hvernig þjálfari hennar kyssti hana með valdi og níddi hana svo með orðum þegar hún neitaði honum.

„Þær eru mjög hræddar við hefndaraðgerðir og mögulega útskúfun þeirra úr skautasamfélaginu,“ segir Park Ji-hoon, lögmaður samtakanna. Þá hafa Park og Sohn einnig farið fram á rannsókn á Jun Myung-kyu, fyrrverandi þjálfara landsliðsins í skautahlaupi, sem enn hefur mikil ítök í skautahlaupsheiminum, fyrir að þagga niður ásakanir um kynferðisbrot.

mbl.is