Tillaga Graham Brady, þingmanns Íhaldsflokksins, um breyttan útgöngusamning úr Evrópusambandinu þar sem breytingar verða gerðar á svokölluðu backstop-ákvæði, var samþykktur á breska þinginu í kvöld með 16 atkvæða mun. Theresa May, forsætisráðherra Bretlands, hvatti þingmenn fyrr í dag til að styðja tillöguna. 

Ákvæðið er líklega umdeildasti hluti Brexit-samningsins og gegndi stóru hlutverki þegar samningurinn var felldur á breska þinginu um miðjan janúar.

Í ákvæðinu felst að ef enginn viðskiptasamingur liggur fyrir tveimur árum eftir útgöngu Breta verði Bretar áfram í tollabandalagi ESB þar til bæði stjórnvöld í Bretlandi og í ESB komast að samkomulagi um annað.

Þó að tillagan hafi verið samþykkt á þinginu er ekki útlit fyrir að leiðtogar ESB séu tilbúnir til að endurskoða útgöngusamninginn. May ræddi við leiðtoga ESB í dag, þar á meðal Jean-Claude Juncker, forseta framkvæmdastjórnar bandalagsins, um mögulegar breytingar á samningnum en án árangurs. Donald Tusk, forseti leiðtogaráðs ESB, sagði eftir að tillagan var samþykkt í kvöld að ekki komi til greina að semja um nýjan útgöngusamning.

Umræður um Brexit-samninginn standa enn yfir á breska þinginu og kosið er um fleiri tillögur sem snúa að útgöngunni, með eða án samnings. Bretar munu að öllu óbreyttu yfirgefa Evrópusambandið 29. mars, eftir slétta tvo mánuði.

Frétt BBC

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• Blogga um frétt