Donald Trump Bandaríkjaforseti hefur óskað eftir því opinberlega að yfirvöld í Kína og Úkraínu rannsaki Joe Biden, sem sækist eftir því að verða forsetaefni Demókrataflokksins í komandi forsetakosningum, og son hans Hunter Biden.
Þetta kom fram í máli forsetans þegar hann var spurður hvað hann vildi nákvæmlega fá frá Volodymyr Zelenskí, forseta Úkraínu.
„Þau [stjórnvöld í Úkraínu] ættu að rannsaka Biden-feðga,“ svaraði Trump og bætti svo við óumbeðinn: „Eins ætti Kína að hefja rannsókn á Biden-feðgum þar sem það sem gerðist þar er alveg jafn slæmt og það sem gerðist í Úkraínu.“
Fulltrúadeild Bandaríkjaþings ákvað í síðustu viku að rannsaka hvort Trump hafi mögulega brotið af sér í embætti með símtali til Zelenskí í sumar.
Í símtalinu þrýsti Trump á Zelensky að rannsaka Joe Biden, mögulegan mótframbjóðanda í forsetakosningunum á næsta ári. Fyrir símtalið hafði Trump komið í veg fyrir að hundruð milljóna dala neyðaraðstoð bærist til Úkraínu.
Trump segist ekki hafa gert neitt rangt og rannsókn á mögulegum embættisbrotum hans vera nornaveiðar. Þá sakar hann demókrata um valdarán.
Hann sakar Biden og son hans um spillingu í viðskiptum þeirra í Úkraínu og Kína, meðal annars á Hunter að hafa nýtt stöðu föður síns til að sannfæra Kínverja um að fjárfesta fyrir einn og hálfan milljarð dollara í fjárfestingafélagi sem hann átti hlut í.
Trump sagðist ekki vera búinn að biðja Xi Jinping, forseta Kína, að hefja rannsókn á feðgunum „enn sem komið er“ en að hann sé að hugsa málið. Þá gaf hann í skyn að feðgarnir hafi stuðlað að því að Kína hafi fengið góðan viðskiptasamning við Bandaríkin, án þess að leggja fram neinar sannanir.