Nýjustu tölur yfir þá sem sýkst hafa af kórónuveirunni í Þýskalandi gefur von um að þar sé að hægjast á útbreiðslu veirunnar.
Þetta sagði kanslari Þýskalands, Angela Merkel, í vikulegu hlaðvarpi sínu sem kom út í dag. Bætti hún við að enn væri of snemmt að íhuga tilslakanir þeirra takmarkana sem settar hafa verið til að stemma stigu við útbreiðslunni.
Skólum hefur verið lokað í landinu, samkomur fleiri en tveggja á almannafæri verið bannaðar og fólki gert að viðhalda að minnsta kosti 1,5 metra fjarlægð frá hvert öðru.
Fjöldi staðfestra smita í landinu nálgast nú 80 þúsund.
Takmörkunum verður að óbreyttu aflétt 19. apríl. Sagði Merkel það þó óábyrgt að skuldbinda sig við fasta dagsetningu hvað það varðaði.