Þúsundir mótmælenda hafa náð að brjóta sér leið að miðborg Minsk í Hvíta-Rússlandi. Óeirðalögregla hefur sett upp hindranir víða um borgina og fjölmargir mótmælendur hafa verið handteknir.
Mótmælendur krefjast sem fyrr afsagnar Alexanders Lúkasjenkós forseta landsins. Yfirvöld í Hvíta-Rússlandi eru sökuð um að hafa falsað niðurstöður forsetakosninganna sem fóru fram fyrir rúmum mánuði.
Fjöldi áberandi stjórnarandstæðinga hefur flúið landið, en mótmælendur og mannréttindafrömuðir hafa sakað lögreglu um að beita friðsama mótmælendur ítrekað ofbeldi.
Óeirðalögregla hefur í dag aukið viðbúnað og komið fyrir vatnsbyssum og öryggistálmum í því skyni að ógna mótmælendum og hindra flæði fólks í miðborgina. Þá hafa margir mótmælenda verið handteknir.