Lögreglan í Berlín stöðvaði í vikunni 600 manna samkvæmi í borginni sem lýst var sem „blætispartíi“ í twitterfærslu frá embættinu. Rýmið sem notað var undir teitið var ekki nógu stórt til að hægt væri að halda uppi fjarlægðartakmörkunum og því var bundinn endi á það, að sögn lögreglu.
Partíið „endaði væntanlega með ófullnægjandi hætti“ fyrir þau 600 sem þar voru saman komin, segir í færslunni. Kaupa þurfti miða fyrirfram til að komast inn í partíið, sem haldið var undir berum himni, og voru einungis 250 slíkir í boði. Það gekk þó ekki eftir, þar sem margir fleiri mættu en miðahafar, og stór hluti þeirra ekki með grímu.
Für ca. 600 Gäste einer Fetisch-Party in #Mitte endete diese vermutlich unbefriedigend.
— Polizei Berlin Einsatz (@PolizeiBerlin_E) October 24, 2020
Wir lösten die Feier in Amtshilfe für das @BA_Mitte_Berlin auf. Die Kolleg. der @bpol_bepo machten anschließend nochmal deutlich, dass es Zeit ist nach Hause zu gehen.#GemeinsamGegenCovid19 pic.twitter.com/sGwzHFN3L3
Þrátt fyrir að hafa gengið betur en mörgum öðrum Evrópuþjóðum að hafa hemil á kórónuveirunni hefur smitum innan Þýskalands fjölgað mjög á síðustu vikum, en dagurinn í gær var sá fjórði í röð þar sem meira en tíu þúsund manns greindust með veiruna þar í landi.