Fyrsti skammturinn af bóluefninu gegn kórónuveirunni frá Pfizer/BioNTech er kominn til Bretlands. Hann var fluttur á ótilgreindan stað og verður í framhaldinu dreift á heilsugæslustöðvar víðs vegar um Bretland.
Bretar hafa pantað 40 milljónir skammta, sem nægir til að bólusetja 20 milljónir manna, að því er kemur fram í frétt BBC.
Að sögn Jonathans Van-Tam, eins helsta ráðgjafa Breta í heilbrigðismálum, gæti fyrsti skammtur bóluefnisins komið í veg fyrir allt að 99% innlagna á sjúkrahús vegna Covid-19 og dauðsfalla.
Hann sagði lykilatriði að dreifa bóluefninu eins hratt og mögulegt er. Bóluefni Pfizer/BioNTech eru búin til í Belgíu og eru flutt til Bretlands í gegnum Eurotunnel.