Merz nýr leiðtogi Kristilegra demókrata

Friedrich Merz, sem var einn helsti mótherji Angelu Merkel innan Kristilegra demókrata, var kjörinn formaður flokksins í dag en miklar vonir eru bundnar við endurkomu flokksins eftir að hann beið afhroð í þingkosningunum í september.

Merz hlaut 62,1% atkvæða í kosningunum, en um 250.000 flokksmenn hafa atkvæðisrétt, og sigraði mótframbjóðendur sína á sannfærandi hátt; Norbert Roettgen (25,8%) og Helge Baun (12,1%).

Merz mun leysa Armin Laschet, sem stutt hafði Merkel, af hólmi. Hann leiddi flokkinn í aðdraganda kosninganna í september en úrslitin voru þau verstu í sögu flokksins þar sem hann hlaut 24,1% atkvæða og 16 ára valdatíð Merkel leið undir lok.

Merz hefur verið einn helsti keppinautur Angelu Merkel. AFP

• Blogga um frétt