Rússneski olíurisinn Lukoil hefur kallað eftir því að átökum í Úkraínu linni – fyrirtækið er þar með fyrst rússneskra stórfyrirtækja til þess að tjá sig opinberlega gegn innrás Rússa í Úkraínu.
Í yfirlýsingu lýsir stjórn Lukoil yfir miklum áhyggjum vegna hörmunganna í Úkraínu og sendir sínar dýpstu samúðarkveðjur til allra hlutaðeigandi.
„Við köllum eftir tafarlausu vopnahléi og lýsum fullum stuðningi yfir diplómatískum friðarviðræðum,“ segir í yfirlýsingunni.
Vladimír Pútín Rússlandsforseti hefur haldið innrásinni í Úkraínu til streitu þrátt fyrir harðar efnahagslegar refsiaðgerðir vesturríkja sem hafa þegar haft áhrif á hagkerfi Rússlands.
Rúblan hefur hríðfallið í verði vegna refsiaðgerðanna og kauphöll Moskvu hefur í kjölfarið verið lokað í nokkra daga en Rússland hefur aldrei staðið verr efnahagslega.