Skutull, málgagn alþýðuflokksmanna á Ísafirði, fagnar áttugasta árgangi en það hóf göngu sína 1923. Gísli Hjartarson, ritstjóri, sótti jólablaðið í prentsmiðju á Ísafirði í gær og segir það síðasta Skutulinn, að minnsta kosti að sinni. „Nú leggst blaðið í dvala en það er hægt að vekja það upp ef á þarf að halda í framtíðinni. Ef pólitískar aðstæður í landinu kalla á þá mun Skutull ganga aftur,“ segir Gísli sem hefur ritstýrt blaðinu síðustu 14 árin.
Meðal ritstjóra Skutuls á áttatíu ára göngu þess eru margir nafntogaðir stjórnmálaleiðtogar m.a. Hannibal Valdimarsson, Vilmundur Jónsson landlæknir og Sighvatur Björgvinsson, fyrrum ráðherra og formaður Alþýðuflokksins svo fáeinir séu nefndir.