Ríkisstjórnin hefur samþykkt að styrkja Rauða kross Íslands um 7,5 milljónir króna, í tilefni af aldarafmæli félagsins. Styrkurinn er veittur sem viðurkenning fyrir ómetanlegt starf félagsins í þágu samfélags og þjóðar.
Þetta kemur fram í fréttatilkynningu á vef Stjórnarráðsins.
Rauði krossinn á Íslandi var stofnaður árið 1924 og fagnar því 100 ára afmæli í ár.
Undanfarin ár hefur Rauði krossinn tekist á við stór verkefni á sviði almannavarna sem félagið sinnir ásamt Slysavarnarfélaginu Landsbjörg.
Þá rak félagið sóttvarnarhús í heimsfaraldrinum og hefur síðustu ár rekið fjöldahjálparstöð fyrir umsækjendur um alþjóðlega vernd, að beiðni stjórnvalda.