Útlit er fyrir að almennt muni sjást lítið til sólar á landinu öllu fram á miðvikudag. Það verður þó áfram milt og rólegt veður, en víðast skýjað.
Þetta segir Birgir Örn Höskuldsson, veðurfræðingur hjá Veðurstofu Íslands, í samtali við mbl.is.
„Það verður einhver rigning af og til, en voða lítið að frétta fram yfir helgi virðist vera.“
Líklegast mun eitthvað sjást til sólar á höfuðborgarsvæðinu á fimmtudag, segir Birgir, en útlit er fyrir að á föstudaginn og um helgina verði suðvestanátt og áfram skýjað á suðvesturhorninu.
Á sama tíma gerir Birgir ráð fyrir að það verði bjart og fallegt í veðri á Norður- og Austurlandi. „Sérstaklega á austanverðu landinu.“