Matur | mbl | 12.6.2020 | 11:01

Kjúklingaborgarinn sem þykir sá allra besti

Ljósmynd/Berglind Hreiðars

Þið vitið að þegar fyrirsagnirnar lofa einhverju lífsbreytandi þá er það uppskrift sem þið verðið að prófa. Það er Berglind Hreiðars á Gotteri.is sem á heiðurinn að þessari snilld — eða öllu heldur Þórunn vinkona hennar en upp á hann var boðið í húsmæðraorlofi í Húsafelli. Þetta er sumsé svona borgari sem konur fá sér þegar á að gera vel við sig. Meira þurfum við ekki að vita!!!

Kjúklingaborgarinn sem þykir sá allra besti

Fyrir 4

4 litlar kjúklingabringur
4 hamborgarabrauð
2 egg
Hveiti til að velta upp úr
Brauðraspur til að velta upp úr
Þunnt skorið rauðkál
Rifinn cheddar ostur
Kóríander
8 msk. majónes
½ lime (safi og börkur)
1 hvítlauksrif
2 msk. smátt saxað jalepeno úr krukku
Salt, pipar og kjúklingakrydd
Franskar/annað meðlæti

Aðferð:

Hitið ofninn í 180°C.
Setjið eina kjúklingabringu í senn í poka og merjið niður með buffhamri/öðru til að þynna og stækka bringuna.
Pískið eggin og kryddið brauðraspinn eftir smekk.
Veltið hverri bringu síðan fyrst upp úr hveiti, þá eggi og að lokum raspi og bakið í ofni í um 30 mínútur á meðan annað er útbúið. Munið eftir að bæta frönskum kartöflum í ofninn ef þið eruð með slíkt meðlæti.
Skerið rauðkálið niður og takið til ost og kóríander ásamt brauðum.
Útbúið jalapeno-majónes með því að blanda saman majónesi, lime, smátt söxuðu jalapeno, rifnu hvítlauksrifi og kryddið til með salti og pipar.
Setjið síðan vel af majónesi á hvern borgara og það meðlæti sem ykkur þykir gott.