Sex marka jafntefli

Valsmenn fagna marki á Kópavogsvelli í kvöld.
Valsmenn fagna marki á Kópavogsvelli í kvöld. mbl.is/Árni Sæberg

Breiðablik og Valur gerðu jafntefli í fjörugum markaleik, 3:3, í Pepsi Max-deild karla í knattspyrnu á Kópavogsvellinum í kvöld. 

Breiðablik er í öðru sæti deildarinnar með 30 stig og Valur í sjötta sæti með 24 stig. Breiðablik er níu stigum á eftir toppliði KR sem vann sinn leik í kvöld og er með 39 stig. 

Valsmenn voru frábærir fyrstu 25 mínútur leiksins eða svo og virtust ætla að leika sér að Blikunum. Í það minnsta voru þeir komnir 2:0 yfir eftir aðeins 19 mínútur með mörkum frá Birki Má Sævarssyni og Patrick Pedersen. 

Blikar voru lengi í gang en þegar þeir fundu leiðina að markinu þá voru þeir innan við fimm mínútur að jafna. Brynjólfur Darri Willumsson minnkaði muninn á 37. mínútu og Andri Rafn Yeoman jafnaði á 41. mínútu með sérlega glæsilegu skoti eftir horn. 

Staðan var því 2:2 að loknum fyrri hálfleik. Leikurinn var rólegur fyrsta korterið í seinni en Blikarnir voru beittari og á heildina litið betri í síðari hálfleik. Brynjólfur skoraði sitt annað mark á 61. mínútu eftir klaufagang í Valsvörninni. 

Þótt Valsmenn hafi ekki skapað sér mörg færi í síðari hálfleik þá náðu þeir engu að síður að jafna og það gerði fyrirliðinn Haukur Páll Sigurðsson með góðum skalla á 69. mínútu. 

Breiðablik var nær því að skora á lokakaflanum en tókst ekki. Seigla í Blikum að vinna upp forskot Vals án tveggja fastamanna, Elfars Freys Helgasonar og Thomasar Mikkelsens. 



Breiðablik 3:3 Valur opna loka
90. mín. Leik lokið 3:3. Liðin fá sitt hvort stigið.
mbl.is