Stjarnan sló meistarana út – Fram vann í vítakeppni

Stjarnan og Fram eru komin áfram í átta liða úrslit Mjólkurbikars karla í fótbolta eftir nauma sigra í leikjum sínum í 16-liða úrslitunum í kvöld. 

Stjarnan hafði betur gegn ríkjandi bikarmeisturum Víkings á útivelli í úrvalsdeildarslag, 2:1. Emil Atlason kom Stjörnunni yfir strax á 1. mínútu og var staðan 1:0 þar til Hilmar Árni Halldórsson bætti við öðru marki Stjörnunnar á 54 mínútu. 

Nikolaj Hansen minnkaði muninn skömmu síðar fyrir Víkinga, en heimamenn náðu ekki að jafna þrátt fyrir fín tækifæri. Fékk Hansen sitt annað gula spjald og þar með rautt á 87. mínútu. 

Í Safamýri vann 1. deildar lið Fram óvæntan sigur á Fylki en úrslitin réðust í vítaspyrnukeppni. Þórður Gunnar Hafþórsson kom Fylki yfir á 44. mínútu og var staðan í hálfleik 1:0. Þórir Guðjónsson fékk gott tækifæri til að jafna fyrir Fram en hann nýtti ekki vítaspyrnu á 65. mínútu. 

Fylkismaðurinn Arnór Borg Guðjohnsen fékk sitt annað gula spjald og þar með rautt á 72. mínútu og við það efldust Framarar og Brasilíumaðurinn Fred tryggði heimamönnum framlengingu með dramatísku jöfnunarmarki í uppbótartíma.

Ekkert var skorað í framlengingunni og eins og áður segir réðust úrslitin í vítaspyrnukeppni. Í henni skoraði Fram úr fjórum spyrnum gegn þremur hjá Fylki, en Fred skaut Fram áfram með marki úr síðustu vítaspyrnunni. 

Brasilíumaðurinn Fred var hetja Framara. mbl.is/Íris

• Blogga um frétt