Þórdís Eva Steinsdóttir, 14 ára stúlka úr FH, er með þriðja til fjórða besta tímann í heiminum í 400 metra hlaupi innanhúss í aldursflokknum 17 ára og yngri á yfirstandandi keppnistímabili.
Þetta kemur fram á vefnum all-athletics.com sem heldur utan um öll afrek í frjálsíþróttum.
Þórdís er fædd árið 2000, og átti einmitt 14 ára afmæli í gær. Hún er tveimur til þremur árum yngri en allar aðrar sem skipa fyrstu tólf sæti listans og það þarf að fara niður í 13. sæti til að finna þar stúlku sem er fædd 1999.
Þórdís hljóp vegalengdina á 56,05 sekúndum á Meistaramóti Íslands í Laugardalshöllinni 1. febrúar. Sömu helgi hljóp Inessa Bogomolova frá Rússlandi, sem er fædd 1997, á 55,83 sekúndum, Hendrikje Richter frá Þýskalandi, fædd 1997, á 55,92 sekúndum, og Anne Sofie Kirkegaard frá Danmörku, fædd 1998, náði nákvæmlega sama tíma og Þórdís Eva.