Franski framherjinn Alexandre Lacazette sem leikur með Arsenal mun ekki leika fótbolta næstu sex vikurnar. Hann gekkst undir aðgerð vegna hnémeiðsla í dag. Meiðslin eru ekki talin mjög alvarleg og aðgerðin framkvæmd til að fyrirbyggja hættuna á frekari meiðslum.
Lacazette hefur spilað 27 leiki fyrir Arsenal og skorað í þeim níu mörk, eftir að hann kom frá Lyon síðasta sumar. Pierre-Emerick Aubameyang gekk í raðir félagsins frá Dortmund í síðasta mánuði og treystir Arsenal á krafta hans í fjarveru Lacazette.
Meðal þeirra leikja sem Lacazette missir af er úrslitaleikur enska deildabikarsins gegn Manchester City, en hann er eftir 12 daga.