Þeir Paul Pogba og Anthony Martial, leikmenn Manchester United, hafa dregið sig út úr franska landsliðshópnum í knattspyrnu. Frakkar mæta Hollendingum í Þjóðadeildinni á föstudag og mæta svo Úrúgvæ í vináttulandsleik fjórum dögum síðar.
Pogba missti af grannaslag United og Manchester City í ensku úrvalsdeildinni í gær vegna meiðsla, en Martial spilaði allan leikinn. Hann hefur hins vegar dregið sig úr landsliðshópnum vegna meiðsla á mjöðm. Martial var nú valinn í hópinn í fyrsta sinn eftir að hafa verið skilinn eftir heima fyrir HM í Rússlandi.
Alexandre Lacazette, framherji Arsenal, og Moussa Sissoko, miðjumaður Tottenham, hafa verið kallaðir inn í landsliðið í þeirra stað.