Leeds biður Derby afsökunar

Enska knattspyrnufélagið Leeds hefur beðið Derby afsökunar eftir að lögregla þurfti að hafa afskipti af njósnara félagsins fyrir utan æfingasvæði Derby en liðin mættust í B-deildinni í gærkvöldi. Þá hafa forráðamenn Leeds einnig rætt við Marcelo Bielsa, þjálfara liðsins, sem viðurkenndi sök sína í málinu.

Frétt af mbl.is

Njósnari Leeds gómaður hjá Derby

Þjálfari úr þjálfarateymi Leeds faldi sig í runnaþykkni og fylgdist með æfingum Derby samkvæmt Frank Lampard, þjálfara liðsins, og viðurkenndi Bielsa strax sök í málinu fyrir leikinn á Elland Road í gær, sem Leeds vann 2:0.

„Í kjölfar ummæla Marcelo Bielsea í gær mun félagið brýna fyrir þjálfaranum og starfsfólki hans að vinna af þeim heilindum sem Leeds hefur verið byggt á,“ segir í yfirlýsingunni sem Leeds gaf út nú í morgun. „Eigandi okkar, Andrea Radrizzani, hefur hitt eiganda Derby, Mel Morris, til að biðjast formlega afsökunar vegna aðgerða Bielsa.“

• Blogga um frétt