Það er bara nóvember

Mohamed Salah sóknarmaður Liverpool segir að það sé of snemmt að ræða um Liverpool sem líklega meistara en fyrir stórleikinn gegn Manchester City á sunndaginn er Liverpool sex stigum á undan Englandsmeisturunum sem er í öðru sæti.

Salah segir að jafnvel þótt Liverpool vinni Manchester City og nái þar með níu stiga forskoti í toppsæti deildarinnar sé úrslitin ekki ráðin í titilbaráttunni.

„Menn töluðu um það í desember á síðasta ári að titilbaráttan væri úr sögunni þegar við vorum með sex til sjö stiga forskot á toppnum. Þetta er ekki búið.

Þetta eru bara þrír leikir og ef þú lendir í slæmum kafla getur þú lent í vandræðum. Þó svo að vinnum leikinn þá er löng leið eftir. Það er bara nóvember,“ sagði Salah við Sky Sports.

Liverpool hefur bara tapað tveimur stigum í fyrstu 11 umferðunum en liðið gerði 1:1 jafntefli við Manchester United á Old Trafford. City hefur hins vegar tapað tveimur leikjum, gegn Wolves og Norwich og gerði jafntefli við Tottenham.

• Blogga um frétt