Óvissa með ástandið á Salah

Jürgen Klopp, knattspyrnustjóri Liverpool, veit ekki hvort hann geti teflt egypska framherjanum Mohamed Salah fram á morgun þegar topplið ensku úrvalsdeildarinnar sækir Crystal Palace heim í þrettándu umferð deildarinnar.

Salah hefur glímt við ökklameiðsli síðan Hamza Choudhury, leikmaður Leicester, tæklaði hann harkalega í leik liðanna í síðasta mánuði. Hann lék ekki með Egyptum í landsleikjatörninni og sást myndaður með hlíf á ökklanum í síðustu viku.

„Hann æfði í gær og hefur getað farið í gegnum ákveðnar æfingar. Ástandið hefur ekki versnað en meiðslin eru áfram til staðar. Við verðum að vera skynsamir og ég verð að sjá hvernig hann kemst frá deginum í dag áður en ég tek ákvörðun,“ sagði Klopp á  fréttamannafundi sínum í dag.

Klopp staðfesti að Virgil van Dijk væri heill heilsu en hann dró sig út úr hópi Hollendinga þegar þeir mættu Eistlandi fyrr í þessari viku.

„Virgil er 100 prósent í lagi en ég get ekki fullyrt um hina. Æfingin í dag er mikilvæg fyrir þá sem komu seint eftir landsleikina, Firminho, Fabinho og Winjaldum. Maður verður að bíða fram á síðustu stundu hvað þá varðar en það kom enginn meiddur heim,“ sagði Klopp.

Þá kom fram að Xherdan Shaqiri væri farinn að æfa með liðinu á ný eftir rúmlega mánaðar fjarveru vegna meiðsla í kálfa. Hann hefur aðeins spilað í 25 mínútur á tímabilinu og einu sinni verið í byrjunarliði frá áramótum. Klopp sagði að Svisslendingurinn væri eftir sem áður í mikilvægu hlutverki.

„Vangaveltur eru vangaveltur og ég get ekkert um það sagt. Hann á svo sannarlega framtíð hjá okkur og í vetur er hann okkur gríðarlega dýrmætur. Hann þarf að ná sér alveg til að geta skilað því sem við þurfum á að halda,“ sagði Klopp, spurður um hvort Shaqiri ætti einhverja framtíð á Anfield.

• Blogga um frétt