Missir af EM í sumar

Jonny Otto er illa meiddur.
Jonny Otto er illa meiddur. AFP

Spánverjinn Jonny Otto leikur ekki knattspyrnu næstu mánuðina eftir að hann sleit krossband á æfingu með Wolves í vikunni.

Um mikið áfall er að ræða fyrir Otto, en hann meiddist á sama hné í ágúst á síðasta ári og sneri aftur á völlinn í febrúar. Hann náði aðeins að leika sjö leiki með Wolves á milli meiðslanna.

Varnarmaðurinn, sem hefur leikið þrjá landsleiki fyrir Spánverja, missir af því sem eftir lifir leiktíðar í ensku deildinni sem og Evrópumótinu í sumar. 

mbl.is