Íþróttir | Formúla 1 | mbl | 7.5.2015 | 9:51 | Uppfært 11:20

Með uppfærða vél til Barcelona

Daniel Ricciardo sýnir aksturskúnstir á Red Bull bílnum við ráðhús Vínarborgar í Austurríki. mbl.is/afp

Renault hefur staðfest að það komi til leiks í Spánarkappakstrinum með uppfærða útgáfu af keppnisvélinni sem það leggur Red Bull og Toro Rosso til.

Ending vélanna hefur ekki verið upp á það besta það sem af er vertíð og hefur það þjakað liðin tvö nánast að staðaldri.

Birtast vandræðin meðal annars í því að Daniel Ricciardo mætir til leiks í Barcelona um helgina með fjórðu vélina á árinu. Þar með er hann búinn að nýta vélakvóta sinn á árinu því hver ökumaður hefur úr aðeins fjórum vélum að spila á allri vertíðinni.

Að vísu þykir útlit fyrir að kvótinn verði aukinn um eina vél, í fimm.

„Þriggja vikna hvíld frá síðasta móti hefur gefið okkur tækifæri til að grannskoða öll vélargögn ársins og leita úrbóta,“ segir keppnisstjóri Renault, Rémi Taffin. „Við höfum verið á fullu í því að reyna útiloka að sömu bilanir endurtaki sig og komum með breytta útgáfu af vélinni til keppni helgarinnar. Hún ætti að bæta endinguna og aksturseiginleika hennar.“