Í gærkvöld varð Portúgal Evrópumeistari U19 landsliða í knattspyrnu karla þegar liðið sigraði Ítalíu 4:3 í framlengdum úrslitaleik.
Staðan var 2:2 eftir venjulegan leiktíma og því var framlengt. Portúgal komst snemma yfir í framlengingunni en Ítalir jöfnuðu á 107. mínútu. Tveimur mínútum seinna eða á 109. mínútu skoraði varamaðurinn Pedro Correia sigurmark Portúgala.
Það skemmtilega við tímasetninguna á sigurmarkinu er að þegar Portúgalar urðu Evrópumeistarar A-landsliða fyrir tveimur árum í Frakklandi kom sigurmark Eder í framlengingunni einmitt á 109. mínútu.
Portúgal varð síðast Evrópumeistari í þessum aldursflokki árið 1999.