Lionel Messi mun ekki leika með Barcelona gegn Dynamo Kíev á útivelli í Meistaradeild Evrópu annað kvöld. Ronald Koeman knattspyrnustjóri Barcelona segir Argentínumanninn þurfa á hvíld að halda.
Messi reyndi hvað hann gat að yfirgefa Barcelona eftir síðustu leiktíð, en eftir rifrildi við félagið tókst það ekki. Messi hefur oft spilað betur en á leiktíðinni og hefur Barcelona farið illa af stað á tímabilinu.
„Ég hef ákveðið að hvorki Messi né Frenkie de Jong koma með okkur til Úkraínu. Við höfum byrjað vel í Meistaradeildinni og riðillinn lítur vel út. Bæði Messi og de Jong þurfa á hvíld að halda því þeir eru búnir að spila mikið,“ sagði Koeman á blaðamannafundi í dag.
Barcelona hefur aðeins unnið einn af síðustu sex leikjum sínum í spænsku A-deildinni og er liðið í 12. sæti, 11 stigum á eftir toppliði Real Sociedad.
Betur hefur gengið í Meistaradeildinni og er liðið með fullt hús stiga eftir þrjá leiki og er liðið komið áfram í 16-liða úrslit með sigri á Dynamo Kíev.