ÍR-ingurinn Erna Sóley Gunnarsdóttir er áfram í hörkuformi í kúluvarpinu í Bandaríkjunum og í kvöld stórbætti hún eigið Íslandsmet innanhúss á háskólamóti í Albuquerque í Nýju-Mexíkó.
Erna kastaði kúlunni 17,70 metra en vikugamalt Íslandmet sem hún setti í Texas um síðustu helgi var 17,34 metrar.
Þetta er ellefta lengsta kast Evrópubúa á þessu ári og það fjórtánda lengsta í heiminum frá áramótum.
Þá náði Baldvin Þór Magnússon úr UFA besta tíma Íslendings frá upphafi í míluhlaupi innanhúss á móti í Notre Dame í Indiana. Hann hljóp á 3:57,12 mínútum og átti sjálfur besta tímann áður, 3:58,08 mínútur á síðasta ári. Þetta er ekki viðurkennt sem Íslandsmet þar sem hlaupið var á 300 metra braut.