Tíðinda er að vænta úr golfheiminum í dag en boðað hefur verið til blaðamannafundar í Wentworth, höfuðstöðvum Evrópumótaraðarinnar. Líklegt þykir að nýr fyrirliði Ryder-liðs Evrópu verði kynntur.
Sögur herma að írski kylfingurinn Padraig Harrington muni taka við fyrirliðastöðunni og taka við af Thomasi Björn, sem leiddi Evrópuliðið til sigurs gegn því bandaríska í Ryder-bikarnum nú í haust. Harrington verður þar með þriðji Írinn til þess að taka við fyrirliðastöðunni.
Harrington, sem er 47 ára gamall og hefur unnið þrjú risamót á ferlinum, hefur verið varafyrirliði í síðustu þremur keppnum en Ryder-bikarinn fer fram annað hvert ár. Hann hafði áður tekið sex sinnum þátt í keppninni sem leikmaður og var þá í sigurliði Evrópu í fjögur skipti.
Talið var að valið stæði á milli Harrington og Lee Westwood um fyrirliðastöðuna en eftir að hinn síðarnefndi gaf út að hann vildi frekar taka við stöðunni fyrir keppnina árið 2022 virðist Harrington eiga útnefninguna vísa.