Norðurírski kylfingurinn Rory McIlroy var í dag útnefndur kylfingur ársins á PGA-mótaröðinni en það voru kylfingar á mótaröðinni sem tóku þátt í kosningunni.
McIlroy hreppti því Jack Nicklaus-viðurkenninguna í þriðja sinn en hann varð einnig fyrir valinu árin 2012 og 2014. N-Írinn hafði betur í baráttunni við Bandaríkjamennina Brooks Koepka, Matt Kuchar and Xander Schauffele.
McIlroy vann þrjú mót á mótaröðinni á tímabilinu og þar á meðal á Tour Championship-mótinu, lokamóti PGA-mótaraðarinnar. Hann varð þar með Fedex-stigameistari og fékk hæsta verðlaunafé í sögu mótaraðarinnar eða 15 milljónir dollara sem jafngildir um 1,9 milljörðum íslenskra króna.