Atvinnukylfingurinn Guðmundur Ágúst Kristjánsson hefur leikið virkilega vel á Opna portúgalska mótinu í golfi en hann lauk öðrum hring í dag. Mótið er liður í Evrópumótaröðinni, þeirri sterkustu í Evrópu. Þeir Guðmundur Ágúst Kristjánsson og Haraldur Franklín Magnús eru á meðal kylfinga á mótinu.
Ekki tókst að ljúka öðrum hring mótsins í gær vegna veðurs en Guðmundur og Haraldur hafa báðir lokið honum í dag. Til stendur að spila þriðja hringinn síðdegis. Guðmundur er sem stendur jafn í 17. sæti eftir að hafa leikið hringinn á pari í dag, 72 höggum, en hann náði aðeins að spila fyrstu holuna í gær áður en stöðva þurfti mótið. Hann er alls á þremur höggum undir pari.
Haraldur Franklín lék fimmtán holur í gær og átti því lítið eftir í morgun. Hann lék á fjórum höggum yfir pari í dag, 76 höggum, og er alls á sex höggum yfir pari í 105.-111. sæti. Fjórða og síðasta hringinn á að spila á morgun.