„Við höfum allt að vinna, engu að tapa gegn sterku og góðu liði,“ sagði Erlingur Richardsson, þjálfari ÍBV, í gær þar sem hann var á hraðferð til Aix en Provence, nokkru norðan við Marseille í Frakklandi.
Þar mæta Íslands- og bikarmeistarar liði PAUC (Aix) á morgun í síðari viðureign liðanna í annarri umferð EHF-keppninnar í handknattleik karla. ÍBV-liðið flaug beint til Lyon í Frakklandi í gærmorgun.
ÍBV vann fyrri viðureignina sem fram fór í Vestmannaeyjum á sunnudaginn var með eins marks mun, 24:23, stendur því þokkalega að vígi þegar flautað verður til leiks í Arena Du Pays D'Aix.
„Við ætlum okkur að nýta leikinn til fullnustu. Það eru möguleikar í stöðunni, meðal annars skoraði liðið aðeins 23 mörk gegn okkur í fyrri leiknum sem getur komið sér vel ef út í jafnan leik verður farið,“ segir Erlingur í Morgunblaðinu í dag.