Brosið fór ekki af Þóreyju Önnu Ásgeirsdóttur, leikmanni Stjörnunnar, þegar mbl.is ræddi við hana eftir að liðið tryggði sér sæti í undanúrslitum bikarkeppninnar í handknattleik í kvöld. Framlengingu þurfti til í æsilegum leik gegn Haukum, 23:22, og Þórey tók undir að það væri ívið skemmtilegra að vinna svona.
„Já eiginlega. Það var spenna í þessu, en það hefði alveg verið þægilegt að klára þetta í venjulegum leiktíma. Þetta var fyrir áhorfendur,“ sagði Þórey Anna himinsæl.
Þórey Anna skoraði markið sem réð úrslitum, úr vítakasti á lokamínútu framlengingar. Áður hafði hún skorað úr fjórum vítum í leiknum, en var hún eitthvað stressuð fyrir þessu?
„Veistu ég hafði engar áhyggjur af þessu. Ég var ekkert stressuð heldur bara sett‘ann í markið. Þetta er ekkert flókið,“ sagði Þórey Anna.
Stjarnan byrjaði leikinn gríðarlega vel, komst í 4:0 en skoraði svo ekki í um 17 mínútur. Hvað fannst henni um spilamennskuna?
„Þær spiluðu fína vörn og við fundum engar lausnir í sókninni. Það tókst þó á endanum, og við spiluðum líka fína vörn sem hjálpaði mikið.“
Stjarnan situr í sjötta sæti deildarinnar með 11 stig og hefur ekki blandað sér í toppbaráttuna á tímabilinu. Gefa þessi úrslit liðinu aukinn kraft til þess að klára tímabilið á jákvæðum nótum?
„Já, guð minn góður! Nú erum við komnar í Höllina og við ætlum alla leið þar. Þó að úrslitakeppnin sé líka mjög skemmtileg þá væri gaman að fá einn bikarmeistaratitil,“ sagði Þórey Anna Ásgeirsdóttir við mbl.is.