Þurfum bara að hugsa um okkur

„Leikurinn úti tapast á síðustu tíu mínútum og þar erum við að klúðra nokkrum dauðafærum. Við erum búnir að fara yfir það og ætlum að gera betur,“ sagði Ólafur Andrés Guðmundsson landsliðsmaður í handknattleik í samtali við mbl.is á Ásvöllum í dag.

Ólafur var að ræða naumt tap Íslands gegn Portúgal á útivelli í undankeppni EM á miðvikudaginn en þjóðirnar mætast aftur í sömu keppni á Ásvöllum annað kvöld. „Það sem við þurfum að laga er eitthvað sem við getum lagað á stuttum tíma, við vitum hvað þarf að gera og nýtum okar tíma í það. Það er leikur á morgun þar sem við viljum taka tvö stig og svo byrjar alvaran,“ sagði Ólafur og átti þar auðvitað við heimsmeistarakeppnina sem hefst í Egyptalandi í næstu viku.

Fyrsti leikur Íslands á HM verður 14. janúar, líka gegn Portúgal en það verður þriðja viðureign liðanna á níu dögum. „Það er skrítið að spila við þá þrisvar á stuttum tíma en ég veit ekki hvort þeir leggja þetta öðruvísi upp á morgun, það er svo sem ekkert sem við getum undirbúið okkur fyrir. Við þurfum bara að hugsa um okkur og við þurfum stig,“ sagði Ólafur við mbl.is.

• Blogga um frétt