Bruno Martini, fyrrverandi markvörður franska landsliðsins í handbolta og núverandi forseti frönsku deildarinnar, var handtekinn í París í vikunni fyrir kynferðisbrot gegn barni og framleiðslu barnakláms.
Martini, sem varð heimsmeistari með Frakklandi á HM á Íslandi árið 1995 og á heimavelli árið 2001, lokkaði unga drengi til sín með smáforritinu Snapchat, braut á þeim og tók athæfið upp.
Komst upp um Martini þegar 13 ára drengur greindi móður sinni frá samskiptum sínum við leikmanninn fyrrverandi. Bauðst Martini m.a. til að borga leigubíl til að fá drenginn í heimsókn.
Var málið til rannsóknar í tvö ár, áður en lögregluyfirvöld í París komust að því að Martini ætti aðganginn á samfélagsmiðlinum. Var gerð húsleit á heimilum hans í París og Montpellier og tölvugögn gerð upptæk.
Martini játaði brot sín við handtökuna og á yfir höfði sér um fimm ára fangelsisvist.