Serbía og Kamerún gerðu 3:3 jafntefli í annarri umferð G-riðils heimsmeistaramóts karla í fótbolta í Al Wakrah í Katar í dag. Bæði lið eiga þá enn möguleika á að komast í 16-liða úrslit.
Brasilía og Sviss eru með 3 stig hvort í G-riðlinum en Kamerún og Serbía með 1 stig. Leikur Brasilíu og Sviss hefst klukkan 16.
Jean Charles Castellette kom Kamerún í 1:0 á 29. mínútu. Dusan Tadic jafnaði í uppbótartíma fyrri hálfleiks og Sergej Milinkovic-Savic kom Serbíu í 2:1 áður en flautað var til hálfleiks.
Aleksandar Mitrovic kom Serbíu í 3:1 á 53. mínútu. Kamerúnar voru ekki af baki dottnir en varamaðurinn Vincent Aboubakar minnkaði muninn í 3:2 á 63. mínútu og Eric Maxim Choupo-Moting jafnaði metin fyrir Kamerún, 3:3, á 66. mínútu.
Aleksandar Mitrovic fékk fyrsta færi leiksins á 6. mínútu. Tadic fékk boltann á hægri vængnum og lagði hann út á Maksimovic sem lyfti boltanum inn á teiginn. Þar reis Mitrovic hæst en skalli hans fór vel yfir mark Kamerún.
Á 11. mínútu tók Mitrovic góðan þríhyrning við Tadic, lék svo á varnarmann hægra megin í teignum en skot hans úr nokkuð þröngu færi small í fjærstönginni. Kostic fékk boltann í kjölfarið en skaut hátt yfir vinstra megin úr teignum.
N'Koulou átti fyrsta skot Kamerúna að marki á 16. mínútu en skotið var hálfslappt utan teigs og fór framhjá marki Serbíu.
Á 17. mínútu barst boltinn til Mitrovic í teignum eftir klafs en fast skot hans fór rétt framhjá.
Kunde hafði betur í kapphlaupui við Maksimovic á 19. mínútu og náði föstu skoti á lofti hægra megin í teignum en Vanja Milinkovic-Savic var vandanum vaxinn í markinu.
Jean Charles Castelletto laumaði sér á fjærstöngina eftir hornspyrnu Kunde sem N'Koulou flikkaði áfram á fjær, 1:0 fyrir Kamerún á 29. mínútu. Það má segja að markið hafi komið nokkuð gegn gangi leiksins.
Lið Kamerún óx ásmegin við markið og Serbar virtust slegnir út af laginu.
Kunde vann boltann á miðjunni á markamínútunni svo kölluðu og geystist af stað upp völlinn. Hann keyrði inn á teiginn og lét vaða á markið en Vanja Milinkovic-Savic varði skot hans vel. Kunde náði frákastinu og hamraði boltanum í fyrsta framhjá markinu.
Dusan Tadic fleytti boltanum inn á teiginn úr aukaspyrnu á fyrstu mínútu viðbótartímans í fyrri hálfleik og þar var það Strahinja Pavlovic sem var dauðafrír og náði góðum skalla upp í bláhornið, 1:1.
Á 3. mínútu í viðbótartíma skoruðu Serbar aftur. Zambo Anguissa tapaði boltanum á hættulegum stað. Zivkovic lagði boltann á Sergej Milinkovic-Savic sem lét vaða utan teigs og boltann söng í netinu neðst í nærhorninu. Serbar voru komnir til baka, 2:1
Serbar byrjuðu fyrri hálfleikinn betur en fyrsta markið var Kamerúna. Serbar virtust slegnir út af laginu en þeir jöfnuðu sig þó nokkuð fljótt og komu til baka með tveimur mörkum í viðbótartíma fyrri hálfleiks og leiddu í leikhléi, 2:1.
Aleksandar Mitrovic kom Serbíu í 3:1 á 53. mínútu. Frábært samspil Serba í og við vítateig Kamerún endaði með afskaplega þægilegu færi fyrir markahrókinn Mitrovic við markteiginn.
Ekambi átti frekar máttlítið skot vinstra megin úr teignum á 62. mínútu sem Vanja Milinkovic-Savic átti ekki í neinum vandræðum með.
Varamaðurinn Vincent Aboubakar slapp inn fyrir vörn Serba á 64. mínútu og kláraði listavel með fallegri vippu yfir Vanja Milinkovic-Savic í marki Serbíu. Flaggið fór á loft en myndbandsdómgæsla úrskurðaði að markið skyldi standa, 3:2
Aboubakar slapp aftur inn fyrir vörn Serba á 66. mínútu og lagði boltann á Eric Maxim Choupo-Moting sem renndi honum í netið af stuttu færi, 3:3 - þvílíkur viðsnúningur!
Mitrovic fékk fínt marktækifæri á 76. mínútu en Epassy varði vel frá honum af stuttu færi hægra megin í teignum.
Sergej Milinkovic-Savic átti skot utan teigs á 78. mínútu.
Á 87. mínútu átti Vincent Aboubakar ágætt skot af ansi löngu færi en Vanja Milinkovic-Savic sá við honum.
Einni mínútu síðar komst Filip Kostic í ágætt færi en sending hans eða skot náði ekki til Mitrovic og Epassy handsamaði boltann.
Á 89. mínútu átti Mitrovic skot úr teignum sem sveif framhjá marki Kamerún.
Á 5. mínútu viðbótartíma í seinni hálfleik átti Nicolas Nkoulou ágætt skot beint úr aukaspyrnu vinstra megin við vítateigshornið en Milinkovic-Savic í marki Serbíu var vandanum vaxinn.
Lokatölur 3:3.
Lið Kamerún:
Mark: Devis Epassy.
Vörn: Collins Fai, Jean Charles Castelletto, Nicolas Nkoulou, Nouhou Tolo.
Miðja: Zambo Anguissa (Samuel Gouet 81.), Pierre Kunde (Gael Ondoua 67.), Martin Hongla (Vincent Aboubakar 55.).
Sókn: Brian Mbeumo (Georges-Kevin N'Koudou 81.), Eric Choupo-Moting, Karl Toko Ekambi (Christian Bassogog 67.).
Lið Serbíu:
Mark: Vanja Milinkovic-Savic.
Vörn: Nikola Milenkovic, Milos Veljkovic (Srdjan Babic 78.), Strahinja Pavlovic (Stefan Mitrovic 56.).
Miðja: Andrija Zivkovic (Nemanja Radonjic 78.), Sasa Lukic, Nemanja Maksimovic, Filip Kostic (Filip Djuricic 90+2).
Sókn: Dusan Tadic, Aleksandar Mitrovic, Sergej Milinkovic-Savic (Marko Grujic 78.).