Staðan er gríðarlega jöfn og spennandi í fjórða milliriðli heimsmeistaramóts karla í handknattleik í Egyptalandi eftir að Svíar og Slóvenar skildu jafnir í kvöld, 28:28.
Leikurinn var hnífjafn og spennandi allan tímann. Svíar voru yfir í hálfleik, 15:14, og í seinni hálfleiknum var jafnt á flestum tölum. Matej Gaber tryggði Slóvenum stigið með því að jafna á síðustu stundu eftir að Hampus Wanne hafði komið Svíum í 28:27.
Fyrir lokaumferðina eru Svíar og Egyptar með 6 stig en Rússar og Slóvenar með 5 stig. Þessi fjögur lið mætast innbyrðis á sunnudaginn en þá leika Svíar við Rússa og Slóvenar við Egypta. Það eru því nánast tveir úrslitaleikir um sæti í átta liða úrslitunum. Hvíta-Rússland með 2 stig og Norður-Makedónía, sem er án stiga, eru hin tvö liðin í milliriðlinum.
Slóvenía: Dragan Gajic 6, Miha Zarabec 5, Blaz Blagotinsek 4, Jure Dolenec 4, Borut Mackovsek 3, Blaz Janc 2, Nejc Cehte 2, Dean Bombac 1, Matej Gaber 1.
Svíþjóð: Hampus Wanne 7, Valter Chrintz 5, Jim Gottfridsson 4, Jonathan Carlsbogard 3, Linus Persson 3, Alfred Jonsson 2, Felix Claar 1, Anton Lindskog 1, Fredric Pettersson 1, Max Darj 1.