Keppni í milliriðlum á HM 2023 í handknattleik karla lauk í kvöld. Danmörk vann öruggan sigur á Egyptalandi og vann þar með milliriðil 4 og Noregur hafði betur gegn lærisveinum Alfreðs Gíslasonar í Þýskalandi og vann um leið milliriðil 3.
Með jafntefli eða sigri hefði Egyptaland unnið riðilinn en Danmörk var ekkert á þeim buxunum og komst sex mörkum yfir snemma leiks, 9:3.
Danir hertu enn tökin og náðu mest átta marka forystu í fyrri hálfleik, 15:7.
Egyptar löguðu aðeins stöðuna eftir það en Danir leiddu þó með fimm mörkum í hálfleik, 17:12.
Í síðari hálfleik var Danmörk áfram við stjórn, náði aftur mest átta marka forystu og hleypti Egyptalandi ekki nær sér en fimm mörkum.
Niðurstaðan að lokum sannfærandi fimm marka sigur, 30:25.
Markahæstir hjá Danmörku voru Simon Pytlick og Mathias Gidsel, báðir með átta mörk. Skammt undan var Mikkel Hansen með sex mörk.
Markahæstur hjá Egyptalandi var Mohab Abdelhak með sex mörk.
Í leik Noregs og Þýskalands voru Norðmenn með undirtökin stærstan hluta fyrri hálfleiks þó Þjóðverjar hafi aldrei verið langt undan.
Þýskaland jafnaði metin í 16:16 undir lok hálfleiksins en Noregur brást við með því að skora tvö síðustu mörk fyrri hálfleiks. Staðan því 18:16, Noregi í vil, í hálfleik.
Í síðari hálfleik unnu Þjóðverjar á og náðu forystunni í fyrsta sinn í leiknum í stöðunni 25:24.
Norðmenn svöruðu því með því að skora fjögur mörk í röð og sigldu að lokum tveggja marka sigri, 28:26, í höfn.
Markahæstur hjá Noregi var Göran Johannessen með fimm mörk.
Markahæstur í leiknum var hins vegar Juri Knorr með átta mörk fyrir Þýskaland.
Þar með er endanlega ljóst hvaða lið mætast í átta liða úrslitum HM 2023.
Átta liða úrslitin:
Frakkland – Þýskaland
Noregur – Spánn
Svíþjóð – Egyptaland
Danmörk – Ungverjaland