Hann vildi slást við dómarann

Edmunds Induss, leikmaður Bjarnarins, spjallaði við mbl.is eftir 3:1-sigurinn á Esju í Hertz-deild karla í íshokkí í kvöld. Eftir mikla rekistefnu og átök gengu leikmenn Esju af velli þegar rúm mínúta var til leiksloka og neituðu að klára leikinn. 

„Við vorum frábærir í öllum leikhlutunum en svo var mikil barátta í leikslok. Allir köstuðu af sér hönskunum, en svona er þetta í hokkí. Svo endaði þetta með að Esja fór út af þegar ein mínúta var eftir. Það er ekkert hægt að gera í því núna,“ sagði Edmunds áður en hann hélt áfram. 

„Þeir voru fúlir út í dómarann, en við vitum ekki af hverju. Einn leikmaður Esju vildi slást við dómarann. Það er svakaleg barátta þegar staðan er 2:1 því Esja vill vinna alla leiki. Þetta byrjaði með að menn voru að ýtast og svo endaði þetta í slagsmálum.

Sigurinn var lífsnauðsynlegur fyrir Björninn, sem á enn veika von á að komast í úrslit deildarinnar. 

„Þetta var seinasti leikurinn á árinu og það er gott að fara í jólin og áramótin með sigur. Það er hins vegar nóg eftir og við þurfum að gera okkur besta og sjá hvað við náum langt,“ sagði Edmunds Induss að endingu. 

• Blogga um frétt