Slóvenskur bakvörður til Hauka

Körfuknattleiksdeild Hauka hefur gert samning við slóvenska bakvörðinn Matic Macek um að spila með karlaliði félagsins á næsta keppnistímabili en umboðsmaður Macek staðfesti þetta í kvöld.

Macek spilaði með slóvenska liðinu Zlatorog Lasko í fyrra sem varð m.a. meistari í Alpe Adria bikarkeppninni sem er haldin milli liða frá Austurríki, Tékklandi, Króatíu, Ungverjalandi, Slóvakíu og Slóveníu. Í þeirri keppni skoraði Macek að meðaltali tíu stig í leik en hann er 188 sentimetrar á hæð og fæddur árið 1994. Þar áður lék hann með liði KK Sentjur.

Í úrvalsdeildinni í Slóveníu spilaði hann tíu leiki á síðasta tímabili og var að meðaltali með sjö stig og tvær stoðsendingar.

Breyttar reglur Körfuknattleikssambands Íslands leyfa nú félögum að semja við eins marga leikmenn innan Evrópusambandsins og þau kjósa.

• Blogga um frétt