Arna Sigríður Albertsdóttir, fyrsti keppandi Íslands í handahjólreiðum á Ólympíumóti fatlaðra, sagði eftir tímatökuna í morgun, fyrri grein sína af tveimur á mótinu, að upplifunin hafi verið skemmtileg þrátt fyrir erfitt gengi.
Hún varð síðust af ellefu keppendum og kvaðst vera frekar fúl yfir því. „Það er frekar leiðinlegt að vera svona langt á eftir þeim bestu og ég ætla að leyfa mér að vera fúl með það í smá tíma en ekki lengi. Ég tek með mér fullt af punktum úr þessari keppni,“ sagði Arna við mbl.is eftir keppnina á Fuji-kappakstursbrautinni í bænum Oyama, um 80 kílómetrum norðan við Tókýó.
„Brautin hér í Fuji er ólík öllum öðrum sem ég hef séð og það er talað um að hún sé mjög erfið. Á nokkrum köflum eru mjög brattar brekkur sem er afar erfitt að hjóla upp, og síðan með kröppum beygjum þegar farið er niður. Það duttu allavega tveir til þrír í brautinni á meðan ég var að fara hana,“ sagði Arna.
Hún lauk keppni með góðum endaspretti og var augljóslega útkeyrð eftir 17 kílómetra krefjandi hjólasprett á rúmum 48 mínútum.
„Já, ég var algjörlega búin í markinu, enda tók ég vel á því á lokasprettinum. Það hjálpaði mér hinsvegar þarna undir lokin að það var finnskur strákur í einhverjum öðrum flokki rétt á undan mér og það gaf mér dálítið pepp á þarna í lokin," sagði Arna en seinni grein hennar, 27 kílómetra götuhjólreiðar, er á dagskrá á morgun og hefst laust fyrir klukkan fjögur í nótt að íslenskum tíma.
„Ég reyni að laga einhverja hluti hjá mér en ég er satt best að segja frekar stressuð fyrir þessu því þetta verður enn erfiðari keppni á lengri braut. En um leið reyni ég að nýta mér reynsluna úr þessari tímatöku,“ sagði Arna og bætti við að margmenni í brautinni hefði helst komið henni á óvart. Fjórir keppnisflokkar, tveir kvennaflokkar og tveir karlaflokkar, voru á ferðinni á sama tíma.
„Já, þetta kom mér á óvart en það var bara fínt að hafa fleiri til að miða sig við í staðinn fyrir að vera ein á ferð. Þó ég hafi verið langt á eftir þeim fyrstu var þetta í heildina séð skemmtileg upplifun, ekki síst að sjá hvað þessar bestu í greininni eru á fáránlega góðum stað.
Þessi íþrótt hefur þróast rosalega á fáum árum og meðalhraðinn hefur aukist gríðarlega. Munurinn frá því ég keppti síðast er mikill,“ sagði Arna Sigríður sem keppti loksins á ný eftir tveggja ára bið en hún komst ekkert á mót erlendis eftir að lokanir hófust vegna kórónuveirunnar og á Íslandi hefur hún enga samkeppni eða mót til að taka þátt í.