Sölu fjarskiptafyrirtækisins Nova er lokið, en í tilkynningu frá bandaríska eignastýringarfyrirtækinu Pt Capital Advisors segir að félagið eigi nú 50% hlut í Nova, á móti fjárfestingarfélagi Björgólfs Thors Björgólfssonar, Novator, og stjórnendum félagsins, forstjóranum Liv Bergþórsdóttur og forstöðumanni tæknisviðs, Jóakim Reynissyni.
Ekki er gefið upp hvernig eignarhlutir Novator og stjórnendanna skiptast, en samkvæmt upplýsinum frá Novator er Novator þar í meirihluta.
„Í febrúar sl. kom fram að Novator hefði samþykkt að eiga áfram aðild að félaginu, enda Nova sem fyrr áhugaverður fjárfestingarkostur, auk þess sem Novator vildi styðja við stjórnendur Nova, sem höfðu ákveðið að fjárfesta áfram í félaginu.Engin áform eru um að selja hlut Novators á næstunni,“ segir í skriflegu svari Ragnhildar Sverrisdóttur talsmanns Novator við fyrirspurn Morgunblaðsins.
Morgunblaðið sagði frá því í janúar að þrátt fyrir frétt af sölunni væri samkvæmt heimildum blaðsins leitað að fjárfestum á Íslandi til að taka þátt í kaupunum. Síðar kom í ljós, eins og sagt var frá í Morgunblaðinu, að enginn af stærstu lífeyrissjóðum landsins ætlaði að taka þátt í kaupunum.
Fyrir kaup Pt. Capital á Nova var Novator stærsti hluthafinn með um 93,7% hlut. Aðrir hluthafar, einkum stjórnendur hjá félaginu, áttu 6,3%.
Pt Capital Advisors er með höfuðstöðvar í Anchorage í Alaska, en stefna félagsins er að fjárfesta á svæðum í kringum heimskautsbaug, þeirra á meðal Alaska, Norður-Kanada, Grænlandi og Íslandi.
Í tilkynningunni segir forstjóri Pt Capital Advisors, Hugh S. Short, að kaupin á Nova séu í samræmi við fjárfestingarstefnu félagsins, sem er að vinna með innlendum og alþjóðlegum fjárfestum á norðurslóðum.