Tilboð Kaupskila, dótturfélags Kaupþings, um að Arion banki kaupi 9,5% af útgefnu hlutafé í bankanum hefur verið samþykkt af honum. Þetta kemur fram í tilkynningu frá Arion banka. Þar segir enn fremur að þetta sé í takt við ákvörðun hluta hluthafafundar Arion banka 12. febrúar þar sem ákveðið hafi verið að taka upp í samþykktir bankans tímabundna heimild stjórnar bankans til þess að kaupa til baka hlutabréf útgefin af bankanum.
„Fyrirhugað er að uppgjör fram fari [sic] þann 21. febrúar 2018. Tilboð Kaupskila til Arion banka er háð því skilyrði að uppgjör hafi átt sér stað á milli Kaupskila og íslenska ríkisins varðandi nýtingu Kaupskila á kauprétti 13% hlutar íslenska ríkisins í Arion banka. Hafi framangreindu skilyrði ekki verið fullnægt á uppgjörsdegi, getur Kaupskil frestað uppgjörsdeginum um allt að tíu daga. Komi til þess að uppgjörsdeginum sé frestað hækkar kaupverð hinna seldu hluta í samræmi við skilmála samnings Kaupskila og íslenska ríkisins. Kaupréttur Kaupskila byggir á samningi við íslenska ríkið frá 3. september 2009,“ segir enn fremur.
Þá segir að Arion banki greiði 90,087 krónur á hlut sem sé sama verð og Kaupskil greiði íslenska ríkinu við nýtingu kaupréttarins. „Heildarkaupverð er rúmlega 17,1 milljarður króna og kemur sú upphæð til frádráttar arðgreiðslu sem samþykkt var á hluthafafundinum 12. febrúar og getur að hámarki verið 25 milljarðar króna.“