Greinendur Capacent meta verðmæti Marel á 328 milljarða króna, í samanburði við 252 milljarða króna markaðsvirði félagsins samkvæmt nýrri verðmatsskýrslu Capacent. Ástæða þessa hærra verðmats er stórbættur rekstur fyrirtækisins, mikill tekjuvöxtur og uppkaup félagsins á eigin bréfum, að því er fram kemur í skýrslu ráðgjafafyrirtækisins.
Verðmatsgengi Capacent á Marel á fyrri hluta ársins 2017 var í samræmi við gengi á markaði en frá miðju síðasta ári hefur munurinn á verðmatsgengi og markaðsgengi aukist jafnt og þétt. Þrátt fyrir gott uppgjör hefur gengi Marels á markaði lækkað og hefur munurinn á verðmatsgengi og markaðsgengi aldrei verið meiri en nú. Tekjur Marels námu 581,1 milljón evra á fyrri árshelmingi samanborið við 496,5 milljónir evra á sama tímabili í fyra. Rekstrarhagnaður (EBIT) var 82,4 milljónir evra en var 61,1 milljón evra á sama tímabili í fyrra.
Í skýrslu Capacent kemur fram að rekstrarhagnaður Marels sé einnig í takt við væntingar. Salan hafi verið meiri en gert var ráð fyrir en framlegð minni. Með hliðsjón af því endurskoðaði Capacent verðmat sitt sem leiddi til 1% hækkunar. Tekið er fram að veginn fjármagnstekjukostnaður hafi lækkað lítillega sem hefur þessi áhrif til hækkunar. Hækkar því verðmat Capacent á Marel um 2% frá síðasta verðmati. peturhreins@mbl.is