Byrjað var að tína kampavínsþrúgur í Frakklandi í gær sem er tveimur vikum fyrr en í venjulegu árferði og stefnir allt í afar gott kampavínsár.
Í Champagne-héraði eru allar þrúgur tíndar með höndunum og voru um 120 þúsund farandverkamenn mættir til starfa í gærmorgun í þorpunum á Côte des Bar-svæðinu.
Stjórn kampavínssamtakanna segir að aðstæður séu einstakar í ár en veðurfar hefur verið mjög hagstætt fyrir vínframleiðendur í Frakklandi að undanförnu. Búast má við einstaklega góðum kampavínsárgangi í ár að sögn sérfróðra.